Aberto o prazo de inscrición no grupo de teatro e coro do CX

Un ano máis, xa temos aquí as inscricións actividades dos grupos de teatro e coro do Centro Xove. 

Gústache o canto ou o teatro e queres formar parte dun grupo de persoas cos teus intereses? Queres aprender máis sobre estas disciplinas de forma divertida e dinámica? Pois isto é para ti!

Despois de adaptarnos ó eido dixital, este ano recuperamos as actividades presenciais, no propio espazo. Estamos encantados de ter á nosa xentiña por aquí de novo. Van todos os detalles para participar!

Inscrición no grupo de teatro e coro do Centro Xove (2021-2022)

Para poder participar nos grupos, cómpre ter en conta que:

• A oferta total é de 12 prazas en rigorosa orde de inscrición.
• Terán prioridade as persoas de 14 a 35 anos empadroadas en Santiago de Compostela.
• O prazo de inscrición comprende do 22 de setembro ó 30 de outubro, ambos incluidos.

Non é necesaria experiencia nin coñecementos previos. Polo tanto, calquer persoa pode inscribirse, pero terán preferencia aquelas que cumpran ditos requisitos.

Lóxicamente, é posible participar en unha ou ambas disciplinas. Lembrade que estas actividades son gratuitas, xa que as subvenciona a Concellaría de Mocidade do Concello de Santiago de Compostela.

Os horarios previstos para as actividades son os seguintes:

• Grupo de teatro do Centro Xove: mércores de 17 a 19
• Grupo de coro do Centro Xove: martes e xoves de 18 a 19:30

Como podo inscribirme?

Para inscribirte, precisamos que envíes un correo a info@centroxove.com cos seguintes datos:

• Nome e apelidos.
• Data de nacemento.
• Número do teu DNI ou documento de identidade.
• Teléfono e correo electrónico de contacto.
• Indica se estás empadroado en Santiago de Compostela.
• Grupo no que queres participar (coro, teatro ou ambos).

Alternativamente, tamén podes enviarnos a información por WhatsApp/Telegram ó 722 720 992, chamar por teléfono ou achegarte persoalmente polo espazo.

Cando se anunciarán os listados de persoas inscritas?

Remitiremos os listados de persoas inscritas e en lista de agarda o venres 1 de outubro por correo electrónico.

As actividades comezarán a semana do 11 de outubro. Lembra que, se tiveses algunha dúbida, podes contactar co equipo do Centro Xove para recibir atención persoalizada!