Hoxe traemos moi boas novas dende o Centro Xove de Creación Cultural: en breve comeza o prazo de inscrición de bandas nos locais municipais de ensaio do Concello de Santiago de Compostela, dependentes da Concellaría de Mocidade.
A inscrición nos locais municipais de ensaio poderá realizarse de forma telemática dende a propia Sede Electrónica do Concello de Santiago de Compostela a partires do día 13 de setembro ás 9:00. Tamén poderedes tramitalo presencialmente, pedindo cita previa no Rexistro Xeral.
Para facilitar o trámite e a participación, subiremos un titorial explicando o procedemento paso a paso nesta mesma web.
Cales son os criterios para participar coa miña banda?
A inscrición nos locais municipais de ensaio, de forma prioritaria, será para as bandas que:
- Teñan unha media de idade entre os 14 e 35 anos.
- Conten cun mínimo de dúas persoas empadroadas en Santiago de Compostela.
- Realicen prioritariamente o trámite (xa que logo, serán atendidas en orde de solicitude e segundo os devanditos criterios).
Se non cumples ditos requisitos, podes enviar a túa solicitude igualmente. O Departamento de Mocidade analizará cada solicitude e resolverá a mesma (por exemplo, asociacións interesadas en ensaiar no espazo, colectivos de músicos, cidadanía, etc.).
Na propia inscrición será posible escoller horarios e días de ensaio. A cesión será dun mínimo de dúas horas semanais por banda, existindo despois a posibilidade de solicitar horas de uso puntual e, por suposto, participar nos cursos do Centro Xove e outras formacións. Iremos informando de todo por este medio e polas nosas redes sociais!