Sobre o Centro Xove de Creación Cultural

Ola! Somos o Centro Xove de Creación Cultural

Este é un servizo dependente do Concello de Santiago de Compostela a través de Concellaría de Mocidade, polo que prioriza dar servizo á mocidade de Compostela. Dende 2016 estamos no fermoso barrio da Almáciga, aló no alto, cunhas hortiñas municipais ben xeitosas, e unhas vistas impresionantes da cidade.

Ofertamos formación a persoas de 14 a 35 anos, residentes, que estuden ou traballen na cidade. Tamén organizamos formacións e eventos de acceso libre sen limitación ningunha, e acollemos iniciativas que a propia cidadanía achega. Temos os locais municipais de música e outras instalacións dispoñibles para ti.

Cal é o noso horario?

O noso horario de apertura comprende:

  • Luns a venres de 10 a 14 h e 16 a 22 h.
  • Sábados de 10 a 14 h e de 16 a 21 h (gravacións e mantemento).
  • Domingos e festivos pechamos.

Debido á situación da COVID-19, o Centro Xove non está aberto ao público sen cita previa.

Por favor, contacta con nós para falar diso, e intentaremos axudar.

* Nota: os horarios poden variar en función da programación ou necesidades do centro.

Usuarios mensuais

Bandas

Profesores

Cursos realizados

ONDE ESTAMOS?

Podes atopar o Centro Xove de Creación Cultural no seguinte mapa. Algunhas cousiñas:

  • Estamos a 15 minutos andando da Praza de Galicia
  • Podes aparcar a bici xusto diante da porta
  • Os autobuses urbanos máis próximos son as liñas 5 e 6. Aínda non temos bus que pare na porta :/
  • Se prefires vir en coche, podes aparcar na contorna. Con todo, pensa sempre en respectar o espazo para o CEIP Apóstolo Santiago (estamos ao carón e as crianzas teñen absoluta prioridade para nós).

É fácil identificarnos: somos o único edificio municipal cun graffiti xigante na porta.

O equipo do Centro Xove de Creación Cultural

Adrián Animador Centro Xove de Creación Cultural

Responsable do departamento de animación sociocultural

María Alonso

Educadora Social e Xestora Cultural por profesión e vocación, comeza dende ben nova a traballar como Animadora Sociocultural en diferentes proxectos vencellados a todos os grupos de idade, e moi especialmente á mocidade. Durante os últimos anos centra a súa labor como educadora no Centro Ágora e no Fórum Metropolitano da Coruña.

Trasladase de forma recente a Compostela, onde coordina proxectos socioeducativos e culturais ao servizo de diferentes concellos da comarca. Incorpórase ao Centro Xove de Creación Cultural en outubro de 2020, sumando ó equipo máis de 10 anos de experiencia en xestión, formación e proxección no ámbito da cultura e da intervención socioeducativa.

Responsable do departamento técnico

Ángel Martínez

Nado en Vitoria-Gasteiz, é Diplomado en Dirección Cinematográfica, ademais de contar coa formación como Técnico de Son e Escenario. Destaca por ter sido premiado por numerosos traballos como director e guionista, acadando unha nominación no Festival de Sitges coa curtametraxe La Noche de Homarus.

Conta con amplísima experiencia en producións musicais e audiovisuais, traballando non só na gravación e mistura de bandas, senón tamén como técnico en representacións teatrais e do ámbito da cultura por toda a xeografía española. Dende 2020, é o responsable do Departamento Técnico do Centro Xove de Creación Cultural.

Coordinador Centro Xove de Creación Cultural

Coordinador

Jesús Magaña

Exerceu como docente na Rede de Centros Socioculturais de Santiago de Compostela (2004-2016), traballando simultáneamente nos servizos da Concellaría de Mocidade (2012+). Coordina o Centro Xove dende a súa creación.

Conta con dúas formacións de grao, en Educación Musical e Primaria, cursando agora o de Psicoloxía. Suma 16 anos de experiencia profesional no ámbito sociocultural, en programas que combinan música e mocidade, en institucións públicas e privadas. Ademais, posúe a certificación C2 en inglés, é especialista en SEO e comunicación dixital, e consultor desas disciplinas en diferentes proxectos.

1
Precisas algo?
Falar con webs non mola.
Queres falar cunha persoa?